ઘરની દિવાલો વ્યથા પૂછે
આંસુ શાના તું વહાવે?
બાગમાં ઊગતા ફૂલો અચાનક,
દિલને કેમ રીઝાવે?
વીખરાયેલી ભીની ચાદર કહે,
મારો લગાવ તને આટલો સતાવે?
પડેલી તમામ વસ્તુઓનો સ્પર્શ ,
હવે છૂટતો કેમ લાગે ?
યાદોથી ભરેલું મન મારું,
ધૂ્સકે ધૂ્સકે કેમ રડે?
બેબાકળું મન એક જ વાત,
મને વારંવાર કરે…..
ઘર તો ઘર છે વહાલી
માત્ર તારું સરનામું બદલાયું છે.
The Audio version of ‘સરનામું બદલાયું છે’
સ્વભાવમાં સરળતા રમે
ને વાણીમાં મીઠાશ વરસે
લાડ સર્વ પર ખૂબ લડાવે
ધ્યાન દરેકનું પળપળ એ રાખે
પપ્પા મારા સૌને ગમે
‘ના’ કદી કોઈને ના કહે
પરિવારમાં જેમનો જીવ વસે
બાળક સાથે બાળક જેવા એ રહે
દરેકના દિલમાં એમનું ઘર એ વસાવે
પપ્પા મારા સૌને ગમે
પોતાને સૌથી છેલ્લે મૂકે
ચિંતા સૌની પહેલા એ કરે
જૂઠ કપટથી દૂર જે ભાગે
દુનિયા જેમને દિલથી માને
પપ્પા મારા સૌને ગમે
જિંદાદિલીથી જીવતા શિખવાડે
દયા ને પ્રેમ જેમના રગરગમાં વસે
સંસ્કારોની ભાતી અમ સૌને આપે
એવા પપ્પા મારા સૌને ગમે
The Audio Version of ‘પપ્પા મારા સૌને ગમે’
અચાનક હું તમને કંઈ આમ મળીશ
સૌથી પહેલા તો તમને વળગીશ
યાદોને કદાચ વાગોળીશ
ને નવી જૂની વાતો પણ કરીશ
થોડું રડીશને થોડું હસીશ
બીજી કેટલીય યાદો બનાવીશ
ખોળામાં તારા આળોટીશ
ને ખુદને થોડા લાડ લડાવીશ
અચાનક હું તમને કંઈ આમ મળીશ
આંખોને થોડું ભરી દિલને થોડું ખાલી કરીશ
હાથોને તમારા પકડીને મારા ગાલ પર ફેરવીશ
માથા પર મારા ચુંબન લઈશ
ને દિલથી ઘણી વાતો કરીશ
કેટલાય મારા સપના પૂરા કરીશ
બસ જો એકવાર તમને મળીશ
અચાનક હું તમને કંઈ આમ મળીશ!
The Audio Version of ‘તમને કંઈ હું આમ મળીશ’
મિત્રતામાં રિસામણાં મનામણા શાનાં,
મનને જે ના સમજે, એવા મિત્ર શું કામનાં?
વાત ઓછી ને કટાક્ષ વધુ કરે,
હાલચાલ પૂછવા જે ફોન પણ ના કરે, એવા મિત્ર શું કામનાં?
અણબનાવ બને ને ખુલાસા ના કરે,
અચાનક અબોલા લઈ લે, એવા મિત્ર શું કામનાં?
બહાના કાઢી વાતને ટાળી દેતા,
મળવા માટે જો ખચકાતા જ હોય, એવા મિત્ર શું કામનાં?
ગેરસમજો કે ઈર્ષ્યા થી દૂર થતા,
દિલને હંમેશા દુ:ખાવતા મિત્ર શું કામનાં?
જૂની યાદ આવે ને કાગળ પર સરી જાય,
ને કવિતા વાંચતા આંખમાં આંસુ ના આવે, એવા મિત્ર શું કામનાં?
The Audio Version of ‘એવા મિત્ર શું કામનાં?’
સતત દરરોજ એવું કામ કરવાનું,
પડે જેમાં બધાને મોજ, એવું કામ કરવાનું!!
હસતા રહી સૌને હાસ્ય મળે, એવું કામ કરવાનું!!
સફળ થાય ‘સ્વ’ ની આ ખોજ એવું કામ કરવાનું!!
દિમાગ સાથે દિવસભર ઝઝૂમતા દિલ પર,
રહે ના રાત વખતે બોજ, એવું કામ કરવાનું!!
જૂઠ અને સત્ય ની કથનીમાં,
સત્ય જીતે એવું કામ કરવાનું!!
કોઈ કંઈ પણ કહે કે “ ખૂબ સારું છે”,
અંદરથી ‘હા’ કહે મન, તો જ એવું કામ કરવાનું!!
The Audio Version of ‘એવું કામ કરવાનું!!’
સમય સાથે આગળ વધતી જાઉં છું ,
પરિસ્થિતિ ને ખુશી થી અપનાવતી જાઉં છું.
ક્યારેક હસાવે ને ક્યારેક રડાવે છે,
જિંદગી ને બસ આમ જીવતી જાઉં છું.
સંબંધોથી ડરતી નથી,
અપેક્ષાઓ થતા જ થોડી ખસી જાઉં છું.
અનુભવ એવા થયા છે કે,
પોતાનાથી જ આમ થોડી ડરી જાઉં છું.
સમય સાથે આગળ વધતી જાઉં છું.
દરેકને ન્યાય અપાતો નથી,
માટે જ કદાચ અણગમતી બની જાઉં છું.
સમજે જો કોઈ મને,
એનો સાથ જીવનભર નિભાવતી જાઉં છું.
The Audio Version of ‘સમજે કોઈ જો મને!’
રસ્તામાં કોઈ મળી જાય અચાનક,
ને મનને ગમી જાય એ અચાનક!
બગીચામાં વીખરાયેલા ફૂલોની સુગંધ,
આવીને તારું નામ પૂછી જાય છે અચાનક!
તારે તો મલકાઈ ને મને જોઈ લેવું,
સમજણ ત્યાં બધી મારી ડૂબી જાય અચાનક!
જાગે જો તું પૂર્વમાં સૂર્યનાં બદલે,
સાચેજ દિવસ ઊગી જાય અચાનક!
બે-ચાર ક્ષણો આવે તારી યાદ જો લઈને,
ગઝલ બની જાય છે અચાનક!
નવી કોઈ ફૂલની કળી દેખાય ત્યાં,
મનમાં સૂતું કોઈ ઊઠી જાય અચાનક!
The Audio Version of ‘અચાનક’
વાણીમાં મીઠાશ સારી કહેવાય,
પરંતુ શબ્દોમાં સત્ય હોવું જરૂરી છે!
સૌને પ્રેમ આપવો કહ્યું છે,
મારા હિસાબે એ પ્રેમમાં વિશ્વાસ હોવો જરૂરી છે!
સાંભળવું સૌને કહ્યું છે,
પણ કોઈની બુરાઈ ના હોય જરૂરી છે!
સ્વભાવ શાંત હોય તો ભલે,
વિચારોમાં સરળતા ખૂબ જરૂરી છે!
હંમેશા હસતા રહો કહ્યું છે,
પરદુ:ખ સમજવું એટલું જ જરૂરી છે!
લખવા માટે તો ઘણું લખી શકાય,
એનો અર્થ સમજી જીવનમાં ઉતારવું ખૂબ જરૂરી છે!
The Audio Version of ‘જરૂરી છે!!’
એક અરજી છે મારી માની લેજો,
ક્યાંક ક્યારેક એકલા ફરી લેજો!
કોઈની આંખમાં ક્યારેક કૂદી પડજો,
ડૂબી ન શકો તો ત્યાં તરી જોજો!
ગમે ત્યારે ઊગજો ને ખીલજો,
સમય આવે ત્યારે સદા ખરી લેજો!
હસતા હસતા ભલે ને ક્યારેક પડજો,
બે ઘડી કોઈને થોડું હસાવી લેજો!
કવિતાઓ કેટલી પણ વાંચો,
ભાવ એમાં રહેલા જરૂરથી સમઝી લેજો!
The Audio Version of ‘એક અરજી’
