Nikki Ni Kavita

છ મહિના વીતવા આવ્યા,
સમય હવે જોરદાર ભાગશે..

સવાર બપોર બેસીને કરેલી,
તારી સાથેની વાતો યાદ આવશે..

 તારો હસતો ચહેરા ને ક્યારેક કરેલો ગુસ્સો,
આંખોની સામે વારંવાર આવશે..

મારું આ ભરાયેલું ઘર,
તારા જવાથી સાવ ખાલી લાગશે..

આવતા જતા જે રૂમના દરવાજા હું વારંવાર ખોલતી,
કેટલાય વખત સુધી હવે બંધ દેખાશે..

દિવસો વીતે છે અને મન ભરાઈ જાય છે,
મારી ભીની આંખોમાં આંસુ કોણ લુછશે?

 જવાની છે પાછી ખબર જ હતી,
છતાં હવે આ મનને કોણ મનાવશે?

જલ્દી જલ્દી પાછી આવજે પ્રીત,
 તારી રાહ આ માનું દિલ હંમેશા જોશે.

રાખો પોતાનું ધ્યાન તમે,
એ જ સૌથી મોટું કામ છે.
સારું સ્વાસ્થ્ય એ જ,
બાળકો માટે એક અનમોલ ભેંટ  છે.

રોજ સવારે વહેલા ઉઠો,
થોડું ચાલો ને થોડું હસો.
ચિંતા બધી છોડીને,
આનંદમાં બસ વસો.

તમે હશો જો સરસને સાજા,
તો ઘર આખું મલકાતું રહેશે.
તમારી આ સુંદર ભેટ જોઈને,
બાળકો પણ ખૂબ હરખાશે .

માટે એક નિયમ જરૂરથી લો,
ખુદની દેખરેખ કરશો.
પોતાના સરસ સ્વાસ્થ્યથી,
બાળકનું જીવન ભરશો.

મનમાં રાખ તું અતૂટ વિશ્વાસ,
આજે  બદલી નાખ તું ઇતિહાસ.

 ન રાખ મનમાં કોઈ તુ ડર,
 સફળતાનો જલ્દી થશે તને ભાસ.

ખોટો ન કર તું સમયને બરબાદ,
દૂર કરીદે તારી અંદરની નિરાશ.

ભલે નસીબ રમે ગમે તેવો દાવ,
તું ન છોડ તારો ખુદનો સાથ.

મહેનતથી જ ખુલશે અઘરો માર્ગ,
અને પૂરી થશે તારી હર એક આશ. 

તું પોતે જ છે એક ઉજાસ,
બસ ખુદ પર રાખ તું અતૂટ વિશ્વાસ.

થકાવત નથી, એક જોશ છે,
મારા કામમાં મને એક મજા છે..

ગમે છે મને જે કરી રહી છું,
સફળતાના શિખરો ધીરે ધીરે ચડી રહી છું..

ગઈકાલ કરતા આજે કંઈક નવું જાણ્યું છે,
મેં મારા પરિશ્રમને જ મારું ઘરેણું માન્યું છે..

હજી તો ઘણું બધું શીખવાનું બાકી છે,
 જ્ઞાન સાગરમાં ડૂબકી લગાવવાની બાકી છે..

રોજ સવારે એક નવી ઉમંગ લાવું છું,
 કામને જ હું મારો ધ્યેય બનાવું છું..

નથી થાકવું મારે, બસ આગળ વધવું છે,
નવું નવું શીખીને જગત જીતવું છે.

ભગવાનની જો જોવી હોય મૂરત,
તો યાદ આવે તારી પ્યારી સૂરત.
આખી દુનિયા ભલે સામે થઈ જાય,
પણ માના આશીર્વાદ કદી ખાલી ના જાય.

મારા દુઃખમાં જે પોતે રડી લે છે,
મારા સુખમાં જે આખું જગ જીતી લે છે.
તારા હાથમાં જે જાદુ છે,
એમાં છુપાયેલા તારો અનંત આશીર્વાદ છે.

થાકીને જ્યારે હું ઘરે આવું છું,
તારા ખોળામાં જ સ્વર્ગ પામું છું.
શબ્દો ઓછા પડે તારા વખાણ માટે,
તે આખી જિંદગી તારી  અમારા પર વારી છે.

માંગુ બસ એટલું જ પ્રભુ પાસે,
તને હંમેશા સ્વસ્થ અને ખુશ રાખે.
દિલથી કહું છું, મારી મા,
તારા વગર સૂની છે મારી આ દુનિયા.

સાથે રહેવું ગમે છે મને,
શું કોઈ શંકા છે તને?
પણ ક્યારેક એકાંત જોઈએ,
હૃદયને ટકોરા કરવાને મને.

નથી હું કંઈ કંટાળી તારાથી,
ના તો દૂરી ગમે છે મને.
બસ, તારા વિનાની પળોમાં,
સમજવી છે તારી કિંમત મને.

થોડી જગ્યા આપી જયારે,
લાગી તારી ખોટ હર પળે મને.
તારી કિંમત શું છે મારી અંદર,
એ વાત ત્યારે સમજાય છે મને.

આ તો એક નાનો પ્રયત્ન છે,
સંબંધને વધુ મજબૂત રાખવા છે મને.
થોડું દૂર રહીને કયારેક તારાથી ,
યાદોમાં રહેવાની મજા આવે છે મને.

કેટલીક રાતો એવી આવે,
ઊંઘ આંખોથી દૂર જ રહે,
ઘડિયાળ ધીમે ચાલે જાણે,
સમય પણ અટકી ગયો લાગે.

પલટાં ખાઈને થાકી જઈએ,
વિચારો મનમાં ઘૂમતા રહે.
“ક્યારે પૂરી થશે આ રાત?”
મન પોતે જ પૂછતું રહે.

ઊંઘ આવે તો થોડી આવેઃ
પણ ફરીથી ઊડી જતી રહે,
આંખ બંધ કરી રાહ જોવી,
સવાર ક્યારે થવાની રહે.

પછી સવાર આવે થાકેલી,
મન ખુશીથી દૂર જ રહે,
નાની વાતે ગુસ્સો આવે,
હૃદય પણ ખિન્ન ખિન્ન રહે.

એવી રાતો સમજાવી જાય,
ઊંઘ વિના અકળામણ રહે.
થોડી ઊંઘ પણ જરૂરી લાગે,
એના થી જ મનને આરામ રહે.