લખવું છે પણ મારા વિચારો ડગે છે,
દેખી આજુબાજુની ઈર્ષા મન મારુ ભમે છે,
ક્યારેક બાળકોમાં આટલું અંતર કેમ લોકો કરે છે,
જોઈ આજ ભેદભાવ મન મારુ રડે છે,
નથી જવું આ રસ્તે પણ પગ ત્યાં જ વળે છે,
કેમ આ વાતો મને આટલી નડે છે,
લખવું છે કંઈ સારું પણ શબ્દો મારા ડગે છે,
ક્યારેક સુખની શોધમાં રસ્તામાં દુ:ખ જ આમ મળે છે,
કેટલું પણ કરીએ થોડું ઓછું પડે છે,
પ્રશંસાના રસ્તામાં સાલુ નસીબ કાચું પડે છે.
The Audio Version of ‘નસીબ’
ક્યારેક સરળ હોય છે,
ક્યારેક અઘરૂં હોય છે,
પણ પરિસ્થિતિ સ્વીકારવું ,
ખૂબ જ જરૂરી હોય છે.
હસીને જીવનને જીવી લે,
કે રડીને એને જીવી લે,
જે પણ પરિસ્થિતિ આવે,
એને હિંમતની સ્વીકારી લે.
કેટલાય ધમપછાડા કરી લે,
કે આ સમયને પ્રેમથી અપનાવી લે,
બધું તારા પર જ છે,
કેમ તું પરિસ્થિતિને સ્વીકારી લે.
મનથી પોતાને સંભાળી લે,
ખુદ પર વિશ્વાસ કરી લે,
સમય જરૂરથી બદલાશે,
બસ તું આજનો સ્વીકાર કરી લે.
મનને થોડું શાંત કરી લે,
થોડું તું ધ્યાન કરી લે,
અઘરૂં આજે જરૂરી છે,
પણ આમ જ તું પરિસ્થિતિને સ્વીકારી લે.
ક્યારેક સરળ હોય છે,
ક્યારેક અઘરૂં હોય છે,
પણ પરિસ્થિતિ સ્વીકારવું ,
ખૂબ જ જરૂરી હોય છે.
The Audio Version of ‘સ્વીકાર’
પ્રશંસા – appreciation
આપણા આ દોડધામવાળા જીવનમાં આપણે આજ તો ભૂલી જઈએ છીએ. ભૂલો શોધ્યા વગર પણ મળી જાય છે, પણ જ્યારે પ્રશંસાની વાત આવે ત્યારે ઘણી હિંમત કરવી પડે છે. કેમ? સાચે શું અઘરું છે કોઈની પ્રશંસા કરવું? સાચે શું અઘરું છે કોઈના માટે બે સારા બોલ બોલવું ?
જ્યારે આપણે કે કોઈ આપણા માટે કંઈ પણ સારું કરે તો આપણે appreciate કરવું જ જોઈએ. પ્રશંસા કરવાથી દિલ જીતાય છે. અનુભવના આધારે જ આજે કહું છું, બે બોલ સારા સાંભળવા સૌને ગમે છે. જ્યારે કોઈ આપણા માટે એનો સમય આપે, તમને કંઈ પણ ગમે એવું કરે તો શું આપણે એના વખાણ ના કરી શકીએ ? એકવાર કરીને જોજો એ વ્યકિત જે પણ તમારા માટે કરતી હશે એના કરતા ઘણું વધારે એને કરવાની ઇચ્છા પણ થશે.
આજે આપણા જ પરિવારમાં તમારા માટે એક પણ વ્યકિત કોઈ સારું કરે અને જો તમને અંદરથી ખુશી આપતું હોય તો please જઈને એ વ્યકિતને કહો કે એનાથી તમે ખૂબ ખુશ છો, સાચું કહું છું તમે ખુશ હશો એના કરતા એ વ્યકિતની ખુશી ઘણી વધારે હશે કારણકે પ્રશંસા સૌને ગમે છે.
કોઈ તમને કહે કે તારી ‘ચા’ ખૂબ જ સરસ બને છે તો તમને વારંવાર એ વ્યકિત માટે ‘ચા’ બનાવવાની ઇચ્છા થશે અને તમે એ ‘ચા’ માં ખાલી સાકરની જ નહી તમારા પ્રેમની મીઠાશ પણ ભરશો અને કોઈ તમારી રસોઈ કે પછી કશામાં પણ ખોડ-ખાંપણ કાઢશે તો તમને એ વ્યકિત માટ કોઈ સારો ભાવ થશે નહી. સાચું કહો તમે મારી વાત સાથે સહમત છો કે નહી ? માટે જ પ્રશંસા ખૂબ જરૂરી છે કારણકે જો તમને પ્રશંસા ગમે છે તો દરેક વ્યકિતને પણ ગમે છે.
આજથી આટલું નક્કી કરો બધામાં સારું જોઈ એમના માટે બે બોલ પણ સારા બોલી દિલથી પ્રશંસા કરો ખૂબ જરૂરી છે આ.
Thank you 🙏🏻
The Audio Version of ‘પ્રશંસા સૌને ગમે છે’
મન છે પ્રશ્નોનો જાળો,
ભરીને બેઠા છીએ કારણ વગરનો માળો.
પોતાને જ નહીં બીજાને પણ દિલથી સાંભળો,
ત્યારે જ મળશે સાચી દિશા ને માર્ગો .
લખો સનેહીજનોને પ્રેમ ભરેલા કાગળો,
ને બાંધીલો સંબંધોના મજબૂત તોરણો.
મન છે પ્રશ્નોનો જાળો,
ભરીને બેઠા છીએ કારણ વગરનો માળો.
ઈર્ષ્યાને સ્વાર્થથી ભરેલી ચર્ચાઓ,
નકામી કરી દેશે જીવનની દરેક ખુશીની પળો.
સૌની સાથે ખુલ્લા દિલથી મળો,
આજ છે કાલે કદાચ નહી મળશે તમને આવી પળો.
The Audio Version of ‘મન’
રાત ઘણીવાર આટલી લાંબી કેમ હોય છે,
તમારી યાદ આવે તો એક બેચેની કેમ હોય છે.
ખુલી આંખો ઊંઘ આવે એની રાહ જોતી હોય છે,
વિચારોની રમઝટ મને ચંચળ કરતી હોય છે.
મન ઉદાસને ભરાયેલું હોય છે,
બસ અચાનક જ રાતે ક્યારેક રડતું હોય છે.
રાત ઘણીવાર આટલી લાંબી કેમ હોય છે,
તમારી યાદ આવે તો એક બેચેની કેમ હોય છે.
સમય ક્યારેક આમ કોણજાણે થંભી જતો હોય છે,
એક એક પળ કાઢવી મુશ્કેલ હોય છે.
દિલ આમ અચાનક ક્યારેક દુ:ખતુ હોય છે,
સવાર ક્યારે પડશે બસ એની રાહ જોતું હોય છે.
રાતો આટલી ભયાનક કેમ હોય છે,
ઊંઘના આવે તો બસ મને રડાવતી હોય છે.
રાત ઘણીવાર આટલી લાંબી કેમ હોય છે,
તમારી યાદ આવે તો એક બેચેની કેમ હોય છે.
The Audio Version of ‘ઉદાસ રાતો’
તારા પર મને ખૂબજ નાઝ થાય છે,
જોઈ તને દિલથી ખૂબ ગર્વનો અનુભવ થાય છે.
ગુણો તારા એવા છે કે અંતર મનને અડી જાય છે,
તને જો કોઇ સમજે તો તું દિલથી ગમી જાય છે.
દરેક ફરજો દિલથી નિભાવતો જાય છે,
આમ જ તું સૌને પોતાના બનાવતો જાય છે.
હરખથી ક્યારેક મારી આંખો ભરાઈ જાય છે,
જોઈ તને મારા દિલને ગજબની ઠંડક થાય છે.
કેટલા પુણ્યો કર્યા હશે તો તું મળી જાય છે,
તું મારો છે એનું દિલથી મને અભિમાન થાય છે.
ખૂબ અઘરું છે તારા જેવા બનવું એવું મને સમજાય છે,
છતાં પણ તને જોઈ બસ તારા જેવા બનવાનું મન થાય છે.
The Audio Version of ‘ગર્વ’
સાચા મનથી તારી પાસે કંઈ માંગુ છું,
મારી જ નહી પણ સૌની ખુશીની માંગણી કરું છું.
ઊભી તારા દ્વારે થોડી આજીજી કરું છું ,
પરિસ્થિતિ ને સ્વીકારી શકે એવી માંગણી કરું છું.
આપ્યું છે બધુ મને કયાં આનાકાની કરું છું,
દરેક જીવના મનની શાંતિની હું આજે માંગણી કરું છું.
ગદગદ થઈ ગયેલું મન થોડું કઠણ કરું છું,
દુ:ખીને જોઈ એના સુખની તારા પાસે માંગણી કરું છું.
બે હાથ જોડી તારી સામે વિનંતી કરું છું,
સૌના ભૂલોને ભૂલી ક્ષમાની માંગણી કરું છું.
સાચા મનથી તારી પાસે કંઈ માંગુ છું,
મારી જ નહી પણ સૌની ખુશીની માંગણી કરું છું.
The Audio Version of ‘માંગણી’
_____એક વાત પૂછું? તમને કેવા ચહેરા ગમે? ઉદાસ, ગુસ્સાવાળા, નારાજ કે પછી હસતા અને ખુશ? ઘણો જ સરળ છે આનો જવાબ, મને પણ હસતા ચહેરાઓ જ ગમે છે તમારી જેમ.
_____આમ તો હું હમેશાં હસતી જ હોઉં છું પણ ક્યારેક હું કોઈ કારણથી ઉદાસ હોઉં તો એની અસર મેં મારી આજુબાજુમાં રહેતી દરેક વ્યક્તિ પર જોઈ છે. મારા માટે અને તમારા માટે આપણી આસપાસની દરેક વ્યક્ત ખૂબ જ મહત્વની હોય છે, પણ આપણી ઉદાસી આ દરેક વ્યક્ત વાંચી શકે છે કારણકે આપણે ઉદાસ હોઈએ ત્યારે હસતા નથી અને ક્યારેક એની અસર બધા પર જોઈ શકીએ છીએ.
_____વાત ખૂબ જ નાની છે, આપણે જેવું આપીએ સામે આપણને એ જ મળશે. એક હાસ્ય આપો અને જુઓ સામે શું મળશે? મેં ઘણા વખતથી નક્કી કર્યું છે કે જેટલાને પણ મળું એક મીઠા હાસ્ય સાથે મળું કારણકે એક વાત ચોક્કસ છે મને સામે હાસ્ય જ મળશે. શરૂઆત મે મારા ઘરની દરેક વ્યક્તિથી કરી અને ધીરેધીરે એમા નંબરો વધતા ગયા. આ હાસ્ય ક્યારેક એમના દુ:ખો ભૂલવાનું કારણ બની શકે છે અને આપણા પણ ભુલાવી શકે છે. આ હાસ્ય એક તમારા ઘરે કામ કરતી વ્યક્તિને એમના પરિવારથી દૂર નથી પણ આજ એનો પરિવાર છે એવી લાગણી આપે છે.નિશાળે જતા બાળકને હસતા મોકલીએ તો એ પણ બધાં સાથે હસીને મળશે.ઓફિસે જતા પતિને હસતા મોકલીએ તો કદાચ આપણો હસતો ચહેરો આખો દિવસ એની સામે રમતો રહેશે અને કામ કરવાની મજા ઘણી વધી જશે. કોઈ ભરી મહેફિલમાં તમારો હસતો ચહેરો ત્યાં ઊભેલી દરેક વ્યક્તિને દેખાશે અને એક ગજબની હકારાત્મક લાગણી તમે ત્યાંથી નિકળશો પછી પણ રહેશે.
_____મારા અનુભવથી હું કહું છું, જ્યારે આસપાસની દરેક વ્યકિત ખુશ જોઈએ છીએ તો ઘણી ખુશી આપણને પણ મળે છે., તો એક નાનકડું હાસ્ય આપી કેમ લોકોને ખુશ ના કરીએ. એક હાસ્યથી જ બધુ સરળ રહેતું હોય તો કેમ જીવનને અઘરું બનાવીએ છીએ.
_____માટે જ કહું છું બસ આટલું જ કરીએ, “ ચાલો હસીએ અને થોડું સૌને હસાવીએ.” 😊
The Audio Version of ‘ચાલો હસીએ અને થોડું સૌને હસાવીએ’
સમય સાથે મારી ક્યારેક અનબન થઈ જાય છે,
હું સાચી કે હું ખોટી એની પરીક્ષા થઈ જાય છે.
મારા જ મન સાથે મારી ઘણીવાર ટસલ થઈ જાય છે,
લોકો શું કહેશે એમા મારી ભાવનાઓની પરીક્ષા થઈ જાય છે.
જાણતા અજાણતાં મારી જ સાથે મારી લડાઈ થઈ જાય છે,
મારા મનની કરવામાં મારી ક્યારેક પરીક્ષા થઈ જાય છે.
મારા વિચારો જ્યારે આ દુનિયાથી વિરુદ્ધ થઈ જાય છે,
ત્યારે આ જીવન મારી મરજીથી જીવવામા પરીક્ષા થઈ જાય છે.
કેમ લોકોની આપણા જીવન પર આટલી અસર થઈ જાય છે,
કે જવાબ હોવા છતા આપણી પરીક્ષા અઘરી થઈ જાય છે.
The Audio Version of ‘પરીક્ષા’
મનમાં તારા જ કહેલા શબ્દો સંભળાય,
પાગલપન જોઈ તારું મન મારુ હરખાય.
જાણ્યા છતા મારામાં રહેલી તમામ નબળાઈ,
અપનાવી મને તો મારી આંખો છલકાઈ.
કેમ ચૂકાવીશ તારા પ્રેમની ભરપાઈ,
શીખવું છે તારી પાસે કોઈનું દિલ કેમ જીતી લેવાય.
દિલના દરવાજે તારી આ દસ્તક સંભળાય,
ચાહતની ઊંડાણ જોઈ મન મારું હરખાય.
સ્પર્શથી જાણે હું તારામાં બંધાય,
તૂટેલી યાદો બધી ગઈ સંધાય.
પકડ્યો તે હાથ મારોને હું થોડી શરમાઈ,
તારા પ્રેમની મને કદર આમ સમજાઈ.
મનમાં તું જ મને વારંવાર સંભળાય,
વળગીને તને કેમ જાણે મન મારુ હરખાય.
