થોડીવાર હજુ લાગશે

હતો એક સમય, જ્યાં તું અને હું,
દિવસ શરૂઆત પણ સાથે કરીએ,
અને રાતના સપનામાં પણ સાથે ફરીએ…

હસતા, રડતા, ભૂલી જતાં દુનિયાને,
એકબીજાના સુખદુખ દિલ ખોલીને કહીએ…
પણ એક ક્ષણમાં કેમ બધું બદલાઈ ગયું?
એકબીજાથી અચાનક નજર ફેરવીને ફરીએ…

પળો કેમ ખાલી ને અધૂરી લાગે,
હવે જ્યારે પણ સાથે મળીએ…
હૃદય બોલે ફરી તો ના તૂટે ને કંઈ?
બસ એ જ ડર કોણ જાણે, દિલમાં લાગે…

વિશ્વાસ એકવાર તૂટી જાય,
તો સંબંધોમાં શું ફરીથી પ્રેમ મળશે?
આમ વારંવાર તારા જતા રહેવું,
શું મળશું ત્યારે બધું પહેલા જેવું જ લાગશે?

દોસ્તી તો આજે પણ છે, દોસ્ત,
શું પહેલા જેવી લાગણી પાછી આવશે?
દૂર કે પછી ક્યારેક શાંત લાગું તને,
સમજી લેજે પહેલા જેવી થતા મને થોડીવાર હજુ લાગશે…