સાથે રહેવાની હંમેશા વાતો કરતા,
ખબર નહીં કેમ લાગણીઓ સમય સાથે બદલાય જાય છે…
અચાનક મળ્યા એક મહેફિલમાં,
ખબર નહીં કેમ પરાયા અચાનક પોતાના બની જાય છે…
બંધાયા જ્યાં એક અતૂટ ગાંઠમાં,
ખબર નહીં કેમ આંખના પલકારામાં સંબંધ વીખરાય જાય છે…
ક્યારેક થોડું ઓછું બોલવાથી,
ખબર નહીં કેમ ત્યાં સ્વભાવની કિંમત મુકાય જાય છે…
કેટલીય યાદોથી ભરેલી છે જિંદગી,
ખબર નહીં કેમ એની એક વાર્તા બની જાય છે…
મૂકવું હતું જ્યાં અલ્પવિરામ મારે,
ખબર નહીં કેમ એ આવીને પૂર્ણવિરામ મુકી જાય છે…
2023 મારા જીવનની ઘણી યાદગાર પળો આપવા માટે તને દિલથી Thank you 🙏🏻
2024 ની શરૂઆત કરતા પહેલા આજે મને મળેલી 2023 ની ઘણી યાદગાર પળો માટે મારે થેન્ક્યુ કહેવું છે, જ્યારે આપણે સારી વાતો યાદ કરીએ ને એ સમયનો આભાર વ્યક્ત કરીએ છીએ ત્યારે એમાંથી જે ખુશી મળે છે એ ઘણી મેજિકલ હોય છે. જીવન એકદમ આનંદિત રહે છે અને બનેલી નાની ના ગમતી વાતો યાદ પણ નથી રહેતી. 2023 માં બનેલી મહત્વની વાતો અને યાદોને આજે મારે દિલથી યાદ કરવી છે અને યુનિવર્સ ને પણ થેન્ક્યુ કહેવું છે.આ થેન્ક્યુ વર્ડ ઘણો મેજિકલ છે, પ્લીઝ જરૂરથી ટ્રાય કરજો તમને મારી વાત એકદમ સાચી લાગશે.જાન્યુઆરી મહિનામાં મારી દીકરી ના લગ્ન ધામધૂમથી કર્યા અને એને ખૂબ પ્રેમાળ જીવનસાથી મળ્યો અમારા જીવનનો સૌથી મોટો અને ખુશી નો દિવસ આપવા માટે 2023 તને થેન્ક્યુ .
મે મહિનામાં વિપસ્સના કરીને આવ્યા પછી મારા જીવન જીવવાની રીત બદલાઈ ગઈ, ગજબની શાંતિ, ખુશી અને સમતાનો અનુભવ થયો. પોતાનામાં ખુશ રહેતા શીખી ગઈ. 2023 થેન્ક્યુ મારા જીવનમાં આવા અમૂલ્ય દિવસો આપવા માટે.
જૂન મહિનામાં દુબઈમાં રમાયેલી બોલિંગ ટુર્નામેન્ટમાં બેસ્ટ ફીમેલ પ્લેયર નો અવોર્ડ મળ્યો. એક અદભુત વિશ્વાસ મારા ખુદ પર આપવા માટે 2023 તને થેન્ક્યુ.
ઓગસ્ટમાં અમારું ડ્રીમહાઉસ તૈયાર થઈ ગયું અને અમે અમારા નવા ઘરમાં મુવ થઈ ગયા. અમારું સપનું ખૂબ જલ્દી પૂરું કરવા માટે 2023 તને થેન્ક્યુ.
સપ્ટેમ્બર મહિનામાં મારા જીવનમાં કરેલો સૌથી મોટો તપ મોક્ષ દંડ તપ સંપૂર્ણ કર્યો, જે 42 દિવસનો હતો પણ અમે ઘણાના સપોર્ટ થી 22 દિવસમાં પૂરો કર્ય. કંઈક અલગ જ શક્તિ આપવા માટે 2023 તને થેન્ક્યુ.
‘Amaraa’ new venture ની શરૂઆત મારી દીકરી સાથે કરી. જેમાં અમે lab grown જ્વેલરી બનાવીએ છીએ. અમારું બીજું એક મોટું સપનું પૂરું કરવા માટે 2023 તને થેન્ક્યુ.
વિનય ગ્રુપ એટલે કે મેડીટેશન ગ્રુપની દુબઈમાં દર સોમવારે મારા જ ઘરમાં શરૂ કર્યું, ખૂબ સરસ અને પોઝિટિવ વાઇબ્સ આપવા માટે 2023 તને થેન્ક્યુ.
આવી ઘણી નાની મોટી યાદો આ વર્ષમાં બની અને આવા ઘણા સપનાઓ પણ પૂરા થયા. એવું નથી કે માત્ર સારી જ વાતો બનતી હોય છે ઘણી દિલને દુખે એવી યાદો પણ બની છે છતાં મેં મારું ફોકસ સારી વાતો પર રાખ્યું , જેનાથી મારું આખું વરસ ખુશીઓથી ભરેલું રહ્યું . જેમ જેમ દરેક વાતો અપનાવતી ગઈ યુનિવર્સ મારા માટે નવા રસ્તાઓ ખોલતું જ ગયું માટે 2023 તને દિલથી થેન્ક્યુ.
તમે જરા વિતેલા દિવસોને યાદ કરી લેજો, જે પણ સારી યાદો કે પળો બની હોય એને દિલથી થેન્ક્યુ કરીને જોજો. એક અંદરથી આનંદનો અનુભવ થશે અને 2024 ની શરૂઆત એકદમ જોશમાં થશે. મારી સાથે થયેલા અનુભવથી કહું છું જેટલો આભાર તમે યુનિવર્સ નો માનશો જીવન એકદમ સરળ અને ખુશનુમાબની જશે. Just one magical word “THANK YOU”
ઘણાં લોકો જીવનમાં આવતા હોય,
જવું જ હોય કોઇને તો ક્યાં રોકી શકાય છે?
સંબંધો ભલેને પ્રેમથી ભરેલા હોય,
એક વાર તૂટે તો પાછા ક્યાં સંધાય છે?
શબ્દો ભલે ને સાચા હોય પણ,
કડવા હોય તો આપણાથી ક્યાં સહેવાય છે?
મન કહે કંઈ અને કરતા હોઈએ કંઈ,
ગમતું હંમેશા ખુદને ક્યાં કરાય છે?
લોકો શું કહેશે એના વિચારમાં,
આપણી જ જિંદગી આપણી રીતે ક્યાં જીવાય છે?
હૃદયમાં થોડી જગ્યા રાખજે દોસ્ત
કંઈ નહીં બસ થોડો વિશ્વાસ રાખજે દોસ્ત ..
જોઈતો નથી દરિયો મને,
બસ ખાબોચિયા જેટલી લાગણી રાખજે દોસ્ત..
નિભાવી તો પડશે ,રાખજે તૈયારી હર પળે,
આ સંબંધમાં એટલી હિંમત તો રાખજે દોસ્ત..
નથી તારી સાથે જાણું છું
સાથે જ છું એવો ભલે ભ્રમ રાખજે દોસ્ત ..
છે જિંદગી ચાર દિવસની એમાં
ભલે મળે પળો થોડી એને ખાસ રાખજે દોસ્ત ..
અપેક્ષાઓ હંમેશા દુઃખ આપે છે
જેટલું પણ અપાય આપીને ખુદને ખુશ રાખજો દોસ્ત..
જિંદગી આમ વીતી ગઈ
પણ તારી લાગણી હંમેશા વધતી ગઈ!
સમય અમારી પાસે હોય કે ના હોય
તારી નજર હર પળે અમ પર ફરી ગઈ!
જ્યારે પણ થોડું એકલું લાગતું
અચૂક તારા ફોનની ઘંટડી વાગી ગઈ!
કોઈપણ માંગણી વગર તું
અમને પ્રેમ આપતી ગઈ!
મહિનાઓ સુધી આવી ના શકી હું
પણ તારી રાહ જોવાની આદત કદી ના ગઈ!
હું કંઈ બોલું કે ના બોલું તું
મારા મનને હંમેશા સમજી ગઈ!
આજે બાળકોને દૂર દેશમાં જોઈ
તારા દિલની હાલત સમજાઈ ગઈ!
તારી મમતા અને કરુણા જોઈને મમ્મી,
‘મા‘ તો આવી જ હોય એ વાત જીવનમાં વણાઈ ગઈ!
દિલથી જોડાયેલા હોઈએ
તો પછી દૂર હોઈએ કે નજીક
શું ફરક પડે છે..
સમજતા એકબીજાને હોઈએ
તો વાત કરીએ કે ના કરીએ
શું ફરક પડે છે..
મનથી જો ગમતા હોઈએ એકમેકને
તો રોજ મળીએ કે ના મળીએ
શું ફરક પડે છે..
ખુશ હોય તું હંમેશા
ભલેને કોઇ બીજા સાથે હોય
શું ફરક પડે છે..
કદર લાગણીઓની હોય જ દોસ્ત,
તારા માનવા કે ના માનવાથી
શું ફરક પડે છે..
કોઈ કઈ કહી દે તો અંદરથી શાંત રહેજે
વિચારોના વાવાઝોડામાં થંભીને શાંત રહેજે
અસંખ્ય સુખો છે આપણા જીવનમાં
થોડા દુઃખો આવી જાય તો શાંત રહેજે
સારા દિવસો અને સારી વાતો રોજ બનશે
નાનકડા અણબનાવ બને તો શાંત રહેજે
સાથે આપણી ઘણી વ્યક્તિઓ રહેશે
કોઈ જતું રહે તો ભૂલીને શાંત રહેજે
મીઠા શબ્દો સાંભળવા સૌને ગમે છે
ગુસ્સો ક્યારેક આવી જાય તો શાંત રહેજે
જીવનની દરેક પળને માણતો રહેજે
કેવી પણ પરિસ્થિતિ આવે બસ શાંત રહેજે
મારા સપના તારી સાથે સાચા પડતા જાય
એને પ્રેમ કહેવાય!
કંઈપણ ના બોલું ને તરત તને સમજાય
એને પ્રેમ કહેવાય!
મારી આંખોમાં આંસુ વહે ને તું દુઃખી થાય
એને પ્રેમ કહેવાય!
મને હસ્તી જોઈને તું હસતો હોય
એને પ્રેમ કહેવાય!
મારી સાથે જેટલો પણ સમય વિતાવે ને ઓછો પડે
એને પ્રેમ કહેવાય!
દુનિયાનાં કોઈ પણ ખૂણામાં હોઉં ને મનમાં તું જ હોય
એને પ્રેમ કહેવાય!
મહેફિલોમાં કે એકાંતમાં નજર તને શોધે
એને પ્રેમ કહેવાય!
હંમેશા આપતો જ રહે અને સામે કોઈ અપેક્ષા ના હોય
બસ એને જ પ્રેમ કહેવાય!
અરીસાની નજરમાં, ખુદને પ્રેમથી નિહાળું છું,
કોઈ કંઈ પણ કહે હું ખુદને ખૂબ ચાહું છું.
લખીને મનને ખાલી, વાંચીને મનને રીઝાવું છું,
કોઈ કંઈ પણ કહે એકાંતમાં પણ ખૂબ ખૂદને માણું છું.
શરીરની સ્વસ્થતા સાથે ધ્યાન કરી મનને પણ સંભાળું છું,
કોઈ કંઈ પણ કહે હું ખુદની હંમેશા ખૂબ કાળજી કરું છું.
વાંચો તો ખુલ્લી કિતાબ નહીં તો સમજની બહાર છું દોસ્ત,
કોઈ કંઈ પણ કહે હું મારા જ દિલ પર રાજ કરું છું.
ક્યારે કડક તો ક્યારેક નરમ બની જાઉં છું,
કોઈ કંઈ પણ કહે મને ગમે એ જ રસ્તો અપનાવું છું.
દુનિયા ફરતા ફરતા બધા શોખ પૂરા કરું છું,
કોઈ કંઈ પણ કહે હું મજાથી જિંદગીને જીવું છુ.
આવી જ થોડી ગાંડી છું દોસ્ત,
મારા જ જન્મદિવસ પર ખુદને ‘Happy Birthday Nikki’ કહું છું,
કોઈ કંઈ પણ કહે ખુદને હંમેશા ખૂબ ચાહું છું.
મનનું મનમાં રાખતી નહીં,
જરૂર પડે ત્યાં બોલી લેજે.
ગૂંચવાળો થવાની રાહ ના જોતી,
ગાંઠો બસ ખોલી દેજે.
મુખ જોવા મળે ઉદાસ તો,
સ્મિત તારું આપી દેજે.
ભીની આંખોને જોતા ની સાથે જ,
આંસુએના લુછી લેજે.
માન અને અભિમાનની બાજીમાં,
સ્વાભિમાનને સાચવી લેજે.
અંત ઘણા આવશે જીવનમાં,
દરેક ક્ષણને ખુલ્લા દિલથી જીવી લેજે.
કર્મોનો આ વળગાડ છે એવો,
ક્યારેક જરા ખુદને ખંખેરી લેજે.