Nikki Ni Kavita

તારા શાંત સ્વભાવને ઓળખવા માંગું છું ,
તારા દિલમાં ચાલતી ગડમથલ સમજવા માંગું છું,
તારા હાસ્ય પાછળ છુપાયેલા દુ:ખનું કારણ જાણવા માંગું છું,
તારી ચુપી પાછળનાં શબ્દો સાંભળવા માંગું છું,
તને સમજી તારી અણસમજને દૂર કરવા માંગું છું,
તારા દર્દને સમજી દરેક ખુશી આપવા માંગું છું,
તારા ખોવાયેલા રસ્તાને નવી રાહ આપવા માંગું છું ,
જયાં તું અટકે ત્યાંથી આગળ લઈ જવા માંગું છું,
તારા ગૂંગળાયેલા મનમાં થોડો શ્વાસ ભરવા માંગું છું,
તને ખૂબ ચાહી બસ નફરતથી દૂર રાખવા માંગું છું,
તારા શાંત સ્વભાવને ઓળખવા માંગું છું.

The Audio Version of ‘અસ્થિર મન’

ફરી તું મને ક્યાંક મળજે,
ના મળે તો બસ મને યાદ કરજે.

ક્યારેક તો આપણી રાહ મળશે,
ના મળે તો બસ મારી રાહ તકજે.

ફરી તું ક્યાંક હાથ પકડજે,
ના પણ પકડે તો સાથ આપજે.

ક્યારેક તો મારી વાત સાંભળજે,
ના પણ સાંભળે તો મારું મૌન સમજજે.

ફરી તું મને ક્યાંક પત્ર લખજે,
ના પણ લખે તો કોરો કાગળ મોકલજે.

ક્યારેક તું પાછો પ્રેમ કરી લેજે,
ના પણ કરે તો નફરતથી દૂર રહેજે.

ફરી તું મને તારી દિનચર્યા કહેજે,
ના પણ કહે તો બસ મારો હાલ પૂછજે.

ક્યારે તો મારી લાગણી સમજજે,
ના પણ સમજે તો બધુ ભૂલી જજે.

ફરી તું મને ક્યાંક મળજે,
ના મળે તો બસ યાદ કરજે.

The Audio Version of ‘વિનંતી’

ફરી ફરી યાદ આવે એવી યાદો બનાવી લઈએ,
દરેક પળોને બસ પ્રેમથી ભરી લઈએ,
સૂર્યાસ્ત-સૂર્યોદય બંને સાથે માણી લઈએ,
આખી આખી રાતો જાગી મનની વાતો કરી લઈએ,
ભરપૂર ધમાલ મસ્તી કરી લઈએ,
દિલ ખોલી ખડખડાટ હસી લઈએ,
દર્દથી ભરેલી વાતો ને બસ ભૂલી જઈએ,
મસ્ત બની મસ્તીમા ઝૂમી લઈએ,
પાગલપનની હદો હવે પાર કરી લઈએ,
ડર ભગાડી દરેક અઘરી પ્રવૃત્તિ કરી લઈએ,
જવાબદારીઓ ભૂલી બસ જલસા હ​વે કરી લઈએ,
દરિયા કિનારે થોડી સાંજો વિતાવી લઈએ,
જાદુની જપી આપી ખુશી અનુભવી લઈએ,
આપણીઆ દોસ્તીની ગાંઠ બનાવી લઈએ,
ફરી ફરી યાદ આવે એવી યાદો બનાવી લઈએ,
બસ એક વાત બરાબર સમજી લઈએ,
ચલને જિંદગી તને જીવી લઈએ.

The Audio Version of ‘જિંદગી તને જીવી લઈએ’

 

બાળપણના દિવસો યાદ આવી જાય છે,
મારા જ કરેલાં તોફાનો મને મલકાવી જાય છે.

રીક્ષામાં છુપાઈને ખાધેલા ફાફડા જલેબી યાદ આવી જાય છે,
સ્કૂલેથી ભાગી ખાધેલા બ્રાન્ટોના ઢોસા યાદ આવી જાય છે,
મારા જ કરેલાં તોફાનો મને હસાવી જાય છે.

ઉપરથી ફેંકેલા સરના માથા પર પડેલા દફતરોની યાદ આવી જાય છે,
મિત્રો સાથેની કાઈનેટીકની સવારી યાદ આવી જાય છે,
મારા જ કરેલાં તોફાનો મને ખડખડાટ હસાવી જાય છે.

સુરતના રસ્તાઓ પર હોર્ન મારી મારીને રખડવાના દિવસો યાદ આવી જાય છે,
કારણ વગર કરેલી સ્કૂલમાં સ્ટ્રાઇકો યાદ આવી જાય છે,
મારા જ કરેલાં તોફાનો મનને મસ્ત કરી જાય છે.

આખી રાતો મિત્રો સાથે કાળીની રાણી રમવાના દિવસો યાદ આવી જાય છે,
સાંજ પડેને બિલડીંગ નીચે સંતાકૂકડીની મજા યાદ આવી જાય છે,
મારા જ કરેલાં તોફાનો મનને ખુશ કરી જાય છે.

ભાઈ-બહેન સાથે કરેલા મીઠા ઝઘડા યાદ આવી જાય છે,
પપ્પા-મમ્મીની ક્યારેક પડતી વઢ યાદ આવી જાય છે,
આ યાદો ક્યારેક મારી આંખ ભીની કરી જાય છે.

બાળપણના દિવસો યાદ આવી જાય છે,
હમેશાં મારા મનને શાંત કરી જાય છે.

The Audio Version of ‘બાળપણની યાદો’

 

‘મા’ તારા જીવન જીવવાનો અંદાજ કંઈક ગજબનો છે,
તારી સૌને પ્રેમ કરવાની કળા કંઈક અજબ જ છે.

‘મા’ તારો સહજ સ્વભાવ એકદમ ગજબનો છે,
દિલને સાફ રાખી બધાંને સાથે રાખવાની અદા કંઈક અજબ જ છે.

‘મા’ તારા સ્નેહમાં બધાંને નવડાવવાની કળા કંઈક ગજબની છે,
સૌની ભૂલોને માફ કરી પ્રેમ કરવાની કળા કંઈક અજબ જ છે.

‘મા’ તારું તે કદીના વિચાર્યું , પરિવારને પ્રથમ રાખવાની કળા કંઈક ગજબ જ છે,
મનને મોટું રાખી બધાંને બધું આપી દેવાની કળા કંઈક અજબ જ છે.

‘મા’ તારા જીવન જીવવાનો અંદાજ કંઈક ગજબનો છે,
તારી સૌને પ્રેમ કરવાની કળા કંઈક અજબ જ છે.

‘મા’ તારા શબ્દોમાં મીઠાશ કંઈક ગજબની જ છે,
સૌના દિલને જીતવાની કળા તારામાં કંઈક અજબની છે.

‘મા’ તારા સ્વભાવમાં ભોળપણ ભારોભાર ગજબનું છે,
કોઈ ગુનો કરે એને પણ ભેટવાની કળા કંઈક અજબ જ છે.

‘મા’ તારામાં અપેક્ષા વિના જીવન જીવવાની કળા કંઈક ગજબ જ છે,
બસ તારી પાસે આજ સીખી જાઉં તો આ જીવન અજબનું છે.

મા’ તારા જીવન જીવવાનો અંદાજ કંઈક ગજબનો છે,
તારી સૌને પ્રેમ કરવાની કળા કંઈક અજબ જ છે.

The Audio Version of ‘‘મા’ તારો અંદાજ’

બે ઘડી બેસી કંઈક લખી લઉં,
સાત ફેરા તારી સાથે ફરી લઉં.

પરોઢને આપણા પ્રણયથી ભરી લઉં,
મારા દરેક શ્વાસમાં તને સમાવી લઉં.

જીવનને રોમાંચિત બનાવી લઉં,
પ્રેમથી તારી દુનિયા સજાવી લઉં.

એક થાડીમાં જમીને થોડો પ્રેમ વધારી લઉં,
તારો હાથ થામી આપણા સપના પૂરા કરી લઉં.

તારી સાથે સંતાકૂકડી રમી લઉં,
શોધીલે તું મને તો બસ તને ભેટી લઉં.

તારી આગોશમાં (હીંચકા પર) ઝૂલી લઉં,
આ ભાસને હકીકત બનાવી લઉં.

પાંખ મળે તો તારી સાથે ઊડી લઉં,
દરિયામાં બે-ચાર ડૂબકી તારી સાથે મારી લઉં.

તારા માથે હાથ મૂકી કસમ એવી લઈ લઉં,
આ જિંદગી બસ તારા નામે લખી લઉં.

બે ઘડી બેસી એક ખાનગી પત્ર લખી લઉં,
સાત ફેરા ફરી જનમ જનમનો સાથ નિભાવી લઉં.

The Audio Version of ‘ખાનગી પત્ર’

 

સંબંધો ક્યારેક મીઠાં તો ક્યારેક કડવા હોય છે,
કેમ અચાનક આપણા મનને નડતા હોય છે?

ક્યારેક પ્રેમ તો ક્યારેક નફરતથી ભરેલા હોય છે,
કેમ આપણી લાગણીઓ સાથે રમતા હોય છે?

સંબંધો ક્યારેક સરળ તો ક્યારેક અઘરા હોય છે,
કેમ આપણા વિચારોથી કંઈક અલગ હોય છે?

ક્યારેક હસાવતાં તો ક્યારેક રડાવતા હોય છે,
કેમ આપણી સમજથી ઘણા પર હોય છે?

સંબંધો ક્યારેક મીઠાં તો ક્યારેક કડવા હોય છે,
કેમ અચાનક આપણા મનને નડતા હોય છે?

કયારેક લાડ તો ક્યારેક ધિક્કારથી ભરેલા હોય છે,
કેમ આપણા દિલને અકળાવતા હોય છે?

સંબંધો જો પ્રેમ અને સમજથી ભરેલા હોય,
તો જ આપણા મનને ગમતા હોય છે.

The Audio Version of ‘સંબંધો’

મમ્મી બન્યાં પછી એક વાત સમજાય ગઈ,
મમ્મી મને તારી કદર સમજાય ગઈ.

બંનેને લાડ કરતા કરતા હું ક્યાંક ખોવાઈ ગઈ,
ત્યાંજ મને તારા લાડની કદર સમજાય ગઈ.

સવારે બંનેને નાસ્તો કરાવતા આજે મારી આંખ ભરાઈ ગઈ,
મારી મમ્મી, મને તારી કદર સમજાય ગઈ.

બંનેની સ્કૂલથી આવવાની રાહ જોતી, ને આખા દિવસની વાતો કરતી,
કેમ જાણે મારી વાતોને મારી મમ્મીની કદર સમજાય ગઈ.

ભૂખ લાગી છે દીકરા, ચલ કંઈ ખાવા આપું?
આજે અચાનક મારી ભૂખને મમ્મી તારી કદર સમજાય ગઈ.

મમ્મી બન્યાં પછી એક વાત સમજાય ગઈ,
મમ્મી મને તારી કદર સમજાય ગઈ.

તને ઊંઘ નથી આવતી દીકરા, ચલ મારી સાથે સૂઈ જા,
આજે મારી ઊંઘને મમ્મી તારી કદર સમજાય ગઈ.

બહુ ઠંડી છે દીકરા, જેકેટ પેરીને જા,
આજે જેકેટ જાતે પેરીને ચાલવા જતા, મમ્મી મને તારી કદર સમજાય ગઈ.

કંટાળો આવે છે, ચલ તને શોપિંગમાં લઇ જઉં દીકરા,
આજે મારા કંટાળાને મમ્મી તારી કદર સમજાય ગઈ.

દીકરા માથું દુ:ખે છે, આવીજા મારા ખોળામાં,
આજે તારા ખોળાની મમ્મી મને કદર સમજાય ગઈ.

હવે તું યુનિવર્સિટી જતી રહીશ, તારા વગર હું એકલી થઈ જઈશ,
આ એકલપણાનાં ડરને સાચેજ મમ્મી તારી કદર સમજાય ગઈ.

તારી આંખો કેમ ભીની છે? બધુ બરાબર છેને દીકરા?
સાચું કહું મમ્મી આજે મારી ભીની આંખોને તારી કદર સમજાય ગઈ.

મમ્મી બન્યાં પછી એક વાત સમજાય ગઈ,
મમ્મી મને તારી કદર સમજાય ગઈ.

The Audio Version of ‘મમ્મી, મને તારી કદર સમજાય ગઈ’

 

નાનકડી એક વાત કહી દઉં,
મન કરે છે તારા પર વિશ્વાસ કરી લઉં .

આંખોને થોડી ઠંડક આપી દઉં,
તને જોઈને જરા શ્વાસ લઈ લઉં.

જિંદગીના સુખ દુ:ખ તારી સાથે માણી લઉં,
તારી છાયામાં આ જીવન જીવી લઉં.

કદી ના તૂટે એવી કસમ આપી દઉં,
બસ તારી માટે આ દુનિયાથી લડી લઉં.

નાનકડી એક વાત કહી દઉં,
મન કરે છે તારા પર વિશ્વાસ કરી લઉં.

રોજ તારી સાથે થોડી ગુપચુપ કરી લઉં,
તારી એજ વાતોમાં મારી સાંજો પૂરી લઉં.

બેસ મારી પાસે જરા તને સ્પર્શ કરી લઉં,
તારા હાથોમાં હાથ આપી આ જિંદગી પસાર કરી લઉં.

નાનકડી એક વાત કહી દઉં,
મન કરે છે તારા પર વિશ્વાસ કરી લઉં.

ઠંડી ઠંડી રાતોને તારી યાદોથી ભરી લઉં,
સપનામાં તો આવીને મળીજા, મારા દિલની વાત કહી દઉં.

તને ખોવાનાં ડરથી કેમ દૂર જતી રહું,
ચલને હવે તને પ્રેમ જ કરી લઉં,
મન કરે છે તારા પર વિશ્વાસ કરી લઉં.

The Audio Version of ‘ચલને તને પ્રેમ કરી લઉં’