કહી દઉં દિલની એક વાત તને,
તારા બનીને રહેવાની આદત છે મને..
જાણું છું, ઓછું બોલે છે તું,
છતાં તારા માટે કવિતા લખવાની આદત છે મને..
ભલેને થોડો ગુસ્સા વાળો છે,
પણ તારી સાથે હસવાની આદત છે મને..
જાણું છું કંઈક અલગ છે તું,
એટલે જ તો તારી સાથે સપના જોવાની આદત છે મને..
તને ખબર હોય કે ન હોય,
હવે તારી સાથે જીવવાની આદત છે મને..
કારણ વગરની વાતો તારી,
સાંભળવી મને ગમે છે.
કહેલા તારા ટુચકાઓ પર,
હસવાનું મને ગમે છે.
પૂછે છે જ્યારે સારવાર મારી,
ચિંતા તારી મને ગમે છે.
કંઈક સમજવા કલાકો વિતાવે,
ત્યાં સમતા તારી મને ગમે છે.
પ્રશ્નોથી ઘેરાયેલી હોઉં ત્યારે,
હાજરી તારી મને ગમે છે.
અપેક્ષા વગરની મિત્રતા તારી,
હંમેશા મારા દિલને ગમે છે.
ચાલતી ચાલતી ક્યારેક થાકી જાઉં જો,
હાથ પકડીને મંજીલે મને લઈ જજે ..
વાતો કરતા ક્યારેક પણ અટકી જાઉં જો,
બોલીને કંઈક વાતાવરણ હળવું કરી જજે ..
આંખોમાંથી અચાનક આંસુ આવી જાય જો,
ખભો બની મારો સહારો બની જજે ..
રાતો મને ક્યારેક લાંબી લાગે જો,
મારી સાથે થોડો સમય વિતાવી જજે..
જીવનની જ્યારે આખરી પળો હોય જો,
વળગી મને વિદાય તું આપી જજે ..
સાથ તો મને તારો જ જોઈએ છે જો,
કહું કે ના કહું બસ તું મને સમજી જજે..
જ્યારે પણ જરૂર હોય સાથે જ દેખાય,
હંમેશા માત્ર પ્રેમ જ આપે એને પપ્પા કહેવાય.
કોઈ કંઈ પણ બોલે તો ચૂપ થઈ જાય,
હસતા હસતા સાંભળી લે એને પપ્પા કહેવાય.
આખી રાતો જાગી ચિંતા કરતા જાય,
બધા ખુશ રહે જે ઈચ્છે એને પપ્પા કહેવાય.
સસ્તી વસ્તુ પોતાના માટે શોધતા જાય,
બાળકોને ગમતી અપાવે એને પપ્પા કહેવાય.
ભૂલ ના હોય તો પણ માફી માંગતા જાય,
મોટું દિલ રાખી સૌને વળગી લે એને પપ્પા કહેવાય.
તબિયતથી હંમેશા ભલે ઝઝૂમતા જાય,
ઊભા રહે થાંભલાની જેમ પરિવાર માટે બસ એનેજ પપ્પા કહેવાય.
તારી સાથે લાગણી કંઈ એવી બંધાઈ,
જાણે પ્રેમથી ભરેલા દરિયામાં ડૂબકી લેવાય.
શબ્દોમાં કેમ કરી વર્ણવું,
અંદરથી જાણે એક સમતા અનુભવાય.
સાથે તો ઘણા છે જીવનમાં,
તારી હાજરી હંમેશા મારી સાથે જ દેખાય.
જોયું જ્યારે જ્યારે મુખડું તારું,
મન મારું આનંદથી હરખાય.
પકડ્યો છે મારો હાથ તે જ્યારથી ,
અનુભવથી કહું છું, જન્મોજનમ કદી ના છોડાય.
વિચારોને શાંત કરવા બસ એક સહારો છે તારો
તારી સાથે અતૂટ સંબંધ છે મારો.
અકળામણ થાય તો સાથ છે માત્ર તારો,
અંતરને શાંત કરવાનો રસ્તો છે તું મારો.
આંખો ભીની થાય ત્યાં આપે છે રૂમાલ તારો,
સાદા શબ્દોમાં કહું સાચો મિત્ર છે તું મારો.
ડૂબતી હોઉં જ્યાં હાથ આપે છે તારો,
કોણ જાણે બની જાય છે ત્યાં જ કિનારો તુ મારો.
કવિતાનાં શબ્દો રૂપે આપે છે સાથ તારો,
આપીને સમય બસ આમ જ તું બની જાય છે મારો.
બાળકો સાથે બાળક બની રમતા,
મારા બા હંમેશા દિલથી ખૂબ હસતા.
સૌ સાથે ભરપૂર વાતો કરતા,
દરેક વાતમાં બાપુજીને ખૂબ યાદ કરતા.
દર દિવાળી એ અચૂક વિઠોડાનું ઘર ખોલતા,
મારા બા દર તહેવાર પરિવાર સાથે દિલથી ઉજવતા.
અંગ્રેજી બોલવાનો ક્યારેક પ્રયત્ન કરતા,
જન્મદિવસ પર happy birthday ‘તૂરીયુ’ કહેતા.
કેટલીય રાતો ભયંકર વેદનામાં જાગતા,
મારા બા અસહ્ય વેદના ને દિલથી સ્વીકારી લેતા.
એમની સાથેના દરેક ફોનમાં એક જ વસ્તુ કહેતા,
‘ખુશ રહેજો બધા’ બસ હસતા હસતા બોલતા .
લોકોને મદદ કરવા હંમેશા તૈયાર રહેતા,
કમળાબા એમના નામની જેમ જ કુમળા હૃદયના હતા.
સમજીને તને સમજવું છે,
તારા સિવાય મારે ક્યાં જવું છે?
આખી રાત તારી સાથે બેસવું છે,
ઊંઘ આવે તો પણ તારામાં મારે જાગવું છે.
વાતો આપણી ક્યાં થાકે છે?
ચુપ રહીને પણ તારા શબ્દો સાથે જોડાવું છે.
ઝઘડો કરવામાં પણ એક મજા છે,
શાંત રહીને હંમેશા કાગળ પેન સાથે ક્યાં રહેવું છે?
તારા વગર જીવમાં વળી જીવ ક્યાં છે?
હૃદયમાં ધબકાર ચાલે ત્યાં સુધી તારામાં મારે રહેવું છે.
અંધારામાં અટવાયા હોઈએ,
દીવો બનીને રસ્તો બતાવી જાય.
ઉદાસી થી ઘેરાયેલા હોઈએ,
અચાનક આવીને મુખ પર હાસ્ય બની જાય.
મંઝિલથી ભટકેલા હોઈએ,
ખુદ પોતે જ માર્ગ બની જાય.
દુઃખોથી ભરેલું જો દિલ હોય,
જાણે એ પ્રેમની દવા બની જાય.
તકલીફો કોઈની પણ જોઈને,
મદદ કરવા હંમેશા તૈયાર થઈ જાય.
ઘણી વ્યક્તિ કંઈ આવી જ હોય,
જે જીવનમાં એક આશીર્વાદ બનીને આવી જાય.
તું કહે કે ના કહે મને બધી સમજ પડી જાય છે,
તું દૂર હોય તો પણ તારી આહ મને સંભળાય છે.
કોણ જાણે કેમ તારા મનમાં ચાલતી ગડમથલ મારા સુધી આવી જાય છે,
હજારો મિલ તું હસતો હોય તો એ હાસ્ય મારા મુખ પર આવી જાય છે.
તારી નાનકડી એક ઉદાસી મારા જીવનને હચમચાવી જાય છે,
તારા માટે હથિયાર વગર પણ દુનિયાથી લડી જવાય છે.
ઠોકર તને જો ત્યાં વાગે તો દર્દ મને અહીંયા થાય છે,
તારા વગરની દરેક પળો પણ તારી સાથે જ જીવાય છે.
દૂર બેઠા બેઠા પણ તારી લાગણીઓ મને સમજાય છે,
અરે તું જો ખુશ હોય તો દુનિયાની દરેક ખુશી જાણે મને મળી જાય છે.
