દીકરી ઘરે પાછી આવી, કેટલીએ ખુશીઓ લાવી,
મારા આંગણામાં ફરી આજે જૂની યાદો આવી.
થોડા મહિના માટે જ ભલે, પણ સપના જેવું લાગે,
મા – દીકરીની દિનચર્યા પહેલાની જેમ ફરી આવી.
સવારથી સાંજ સુધી વિચાર એક જ મનમાં,
એને શું ગમે, શું ખાવું, અહીં એ હવે આરામ કરવા આવી.
રસોઈમાં એની પસંદ, વાનગીમાં પ્રેમ ભર્યો,
દરેક પળમાં એ જ મુખ્ય, દરેક પળ એના માટે આવી.
કેમ પૂરી થશે હવે વાતો અમારી,
મારા દરેક સપનાને મારી સાથે જીવવા આવી.
બાળક લઈને આવશે ખુશી, આશીર્વાદનો ભંડાર,
અમ સૌને એક અનમોલ ઉપહાર આપવા આવી.
મા તરીકે હું આજે દુનિયા ઉપર છું, દીકરી મારી પાસે ,
ફરી એ જ જૂના દિવસો જાણે એ લઈને આવી.
