મનમાં તારા જ કહેલા શબ્દો સંભળાય,
પાગલપન જોઈ તારું મન મારુ હરખાય.
જાણ્યા છતા મારામાં રહેલી તમામ નબળાઈ,
અપનાવી મને તો મારી આંખો છલકાઈ.
કેમ ચૂકાવીશ તારા પ્રેમની ભરપાઈ,
શીખવું છે તારી પાસે કોઈનું દિલ કેમ જીતી લેવાય.
દિલના દરવાજે તારી આ દસ્તક સંભળાય,
ચાહતની ઊંડાણ જોઈ મન મારું હરખાય.
સ્પર્શથી જાણે હું તારામાં બંધાય,
તૂટેલી યાદો બધી ગઈ સંધાય.
પકડ્યો તે હાથ મારોને હું થોડી શરમાઈ,
તારા પ્રેમની મને કદર આમ સમજાઈ.
મનમાં તું જ મને વારંવાર સંભળાય,
વળગીને તને કેમ જાણે મન મારુ હરખાય.
આજના દિને સપનાઓ હકીકત બની ગયા,
ને એકબીજા સાથે વર્ષો વીતી ગયા.
લાગે છે જાણે આજે જ આપણે મળી ગયા,
ને હાથ પકડી બસ આમ ફરવા નીકળી પડયા.
પ્રેમથી એકબીજાને હમેશાં સાચવી રહ્યા ,
ને એકબીજામાં વસી એકબીજાના બની ગયા.
વચનો આપી બસ એને નીભાવતા શીખી ગયા,
એકબીજાની ખુશીમાં જ ખુશ થઈ ગયા.
અનહદ લાગણી બંને બસ આમ વરસાવતાં રહ્યા ,
ને બે દિલને એક જ દિલમાં વસાવી ગયા.
જોતજોતાંમાં બે નાં આપણે ચાર થઈ ગયા,
પ્રેમનો બંધાણ ગજબનો મજબૂત કરતા રહ્યા .
રોજરોજ આ સાથ અતૂટ કરતા ગયા,
લોકો માટે જાણે પ્રેમ કહાની લખતા રહ્યા .
લખતા આ કવિતા મારા ગાલ મલકાઈ ગયા,
તારી સાથેની દરેક પળો મને રોમાંચિત કરી રહ્યા .
લાગે છે જાણે આજે જ આપણે પરણી ગયા,
ને ખબર જ ના પડી કયાં ૨૧ વર્ષ વીતી ગયા.
The Audio Version of ‘પ્રેમ કહાની’
_____નાના-નાના ઝઘડા, વાદ-વિવાદ કે પછી ગેરસમજ દરેક સંબંધમાં થાય છે, પણ સાચું કહો એનું કારણ ક્યારે પણ તમે વિચાર્યું કે આમ કેમ થાય છે? એટલું જ નહી તમે એનો આરોપ હમેશાં બીજા ઉપર જ ઢોળ્યો હશે.
_____જ્યારે મારા મારા બાળક સાથે કે પતિ તે પછી સાસુ સાથે નાનો પણ વિવાદ થાય ત્યારે હું એમ જ બોલી દઈશ કે કાશ એ મને સમજી શકતે પણ મેં કદી પણ ના વિચાર્યું કે એ પણ મારી જેમ જ વિચારતા હશે. હમેશાં જ્યારે આપણે કંઈક બીજાને લઈને અપેક્ષા કરતા હોઈએ, ત્યારે કેમ નથી વિચારતા કે એની અપેક્ષા પણ કંઈક એવી જ હશે.
_____આપણે લોકોને સુધારવાનો પ્રયત્ન કરીએ છીએ પણ ક્યારેય એમ વિચાર્યું કે ભૂલ મારી પણ હોય શકે. વાત ભલેને નાની હોય કે મોટી એને સમજવાની શરૂઆત આપણે જ કરી લઈએ તો જીવન ઘણું સરળ અને સંબંધો વધુ મજબૂત થઈ જશે. ગેરસમજો વધુ સંબંધોને ખલાસ કરી નાંખે છે. કેમ આપણો એ સંબધ એટલો નબળો છે કે એક ગેરસમજથી હલી જાય? જ્યારે થર ઉપર થર જામતા જાય ત્યારે ચીકાશ કાઢવી ખૂબ અઘરી થઈ જાય છે. બીજાની ભૂલ શોધવા પહેલા હું માત્ર એ જ વિચારી લઉં કે મારી કયા ભૂલ છે? અને મારી ભૂલ નથી છતા મારા માટે મહત્વનું શું છે, વ્યક્તિ કે વ્યક્તિ એ તરેલી નાનકડી ભૂલ?
_____મને એમ લાગે છે મારા અનુભવથી જયારે આપણે બીજાને દિલથી સમજવાની કોશિશ કરીએ છીએ આપણા માટે કંઈ અઘરું નથી હોતું અને એના માટે માત્ર ને માત્ર એક જ રસ્તો છે:જ્યારે પણ ભૂલ શોધીશ, શરૂઆત હું મારાથી જ કરીશ. કેમ આપણે આપણા સંબંધો બચાવવા અને એને મજબૂત બનાવવા આટલું ના કરી શકીએ?
The Audio Version of ‘શરૂઆત મારે મારાથી જ કરવી છે’
લાગણીની કદર ના તે કરી,
ને તારા પ્રેમની કદર ના મેં કરી.
આપેલા સમયની પ્રશંસા ના તે કરી,
ને તને સમજવાની મહેનત ના મેં કરી.
પરિસ્થિતિની ઓળખ ના તે કરી,
ને તારા શબ્દોની કદર ના મેં કરી.
તારી ઉદાસી દૂર કરવાની કોશિશ ના મેં કરી,
મને ખુશી આપવાની કોશિશ ના તે કરી.
વાત તારી સાથે બરાબર ના મેં કરી,
ને મને છોડી જવાની જીદ તે કરી.
ભૂલ ઘણી તે પણ કરી,
ને ભૂલ ઘણી મેં પણ કરી.
The Audio Version of ‘ભૂલ’
મારા હાથમાં આ તારો હાથ,
મળી ગયો મને દુનિયાનો સાથ.
બાગમાં ઊગેલા આ ફૂલોનો ભાગ,
ગમી ગયો રંગબેરંગી પતંગિયાનો સાથ.
સંભળાતો કલરવ કરતા પંખીઓનો રાગ,
રેલાઈ ગયો ગગનમાં જાણે સંગીતનો સાથ.
મારા હાથમાં આ તારો હાથ,
મળી ગયો મને દુનિયાનો સાથ.
તળાવમાં ભરપૂર સુંદર કમળોનો ઠાઠ,
મોહી ગયો દિલથી દિલનો સાથ.
ફૂટી રહ્યા છે મનમાં મારા હરખના બાગ,
થામી તને બાંધી દઉં જીવનભરનો સાથ.
મારા હાથમાં આ તારો હાથ,
મળી ગયો મને દુનિયાનો સાથ.
The Audio Version of ‘સાથ’
દસતક કરી કોઈએ દરવાજે,
આવ્યો છે એક પત્ર મારા નામે,
સરી ગયા ખુશીના આંસુ આંખે,
લાગે છે હારેલી બાજી જીતી હું આજે,
બંધ લીફાફાને જોઈ મન મારુ નાચે,
કાશ આવી ગઈ હોય ‘હા’ એની આજે,
રાહ જોઈ થાકી હું રોજ આમ નાકે,
ને આવી ગયો ટપાલી મારા સરનામે,
વાંચું કે ના વાંચું ધડકન ચડી છે રફતારે,
હરખથી ચડ્યું છે મન મારુ રવાડે,
એનો પત્ર સમજી દોડી હું ગામે ગામે,
હતી એ એના લગ્નની કંકોતરી મારા નામે 😭.
The Audio Version of ‘એક પત્ર’
સારું યાદ રાખી જૂનું બધુ ભૂલી જઈએ,
નવા વર્ષને નવેસરથી આપણે સૌ જીવી લઈએ.
ગેરસમજો બધી છોડી નવી રફતાર પકડી લઈએ,
પ્રેમની ગાંઠને થોડી વધુ મજબૂત કરી લઈએ.
બાકી રહેલા સપનાઓ પૂરા કરી, નવા સપનાઓ રચી લઈએ,
મનના ભાવોને હિંમત આપી વધુ જીવંત કરી લઈએ.
કાળી રાતો ભૂલી નવી સવારને ગળે વળગી લઈએ,
ખુદને જ નહી, સૌને એક નવી હિંમત આપી દઈએ.
કડવાહટ ભૂલી નવી સવારને ગળે વળગી લઈએ,
સૌ જીવને સમાન ગણી સૌના દિલમાં વસી જઈએ.
જાણે નવી જિંદગી મળી હોય એમ ખુશીથી ધીમી લઈએ,
નવા વર્ષની શરૂઆત એક સારા નિર્ણયથી કરી લઈએ.
જૂઠને છોડી સત્યને અપનાવી લઈએ,
નવા વર્ષને નવેસરથી ચલો બસ જીવી લઈએ.
The Audio Version of ‘નવી શરૂઆત’
આપીને થોડી લઈલે,
આમ જ તો મળે છે ખુશી!!
કરીલે મદદ કોઈ અજાણ્યાની,
ને જોઈલે કેવી મળે છે ખુશી!!
હસાવીલે કોઈ ઉદાસ ચહેરાને,
માણીલે એ અજબની ખુશી!!
જમાડીને કોઈ ભૂખ્યાને,
મહેસૂસ થશે ગજબની ખુશી!!
પહોચાડી અંધને સામે પાર,
બંધ આંખ જોઈલે એની ખુશી!!
અંતમાં તો બધુ જ છે ખાખ,
તો કેમ ખચકાય છે આપતા ખુશી!!
જરૂર તો તને પણ ને મને પણ,
બસ તો વહેચીલે દુનિયામાં ખુશી!!
આપવાથી જે મળે છે,
એને જ કહેવાય છે સાચા અર્થમાં ખુશી!!
The Audio Version of ‘ખુશી’
આવા ઉદાસ દિવસોને તારી સાથીની નારાજગી,
તું મારાથી આમ નારાજ રે, મને ગમતું નથી.
આમ બેઠા હોઈએ ને આપણે વાત પણ ના કરીએ, આવી આવી આપણી ચૂપી, મને ગમતું નથી.
નજરથી મને જોઈ ને નજર પણ ના મિલાવે,
આવું તારું જોયું નાજોયુ, મારા મનને ગમતું નથી.
સાથે જમતા હોઈએ ને બસ તું આમ ફોન પર હોય,
મારી સાથે વાત પણ ના કરે, મને ગમતું નથી.
રિસામણાંના કોઈ કારણ જ ના હોય ને બસ તું કારણ જ શોધે,
મનમાં આમ વારંવાર ગૂંગળાવું, મને ગમતું નથી.
હું આમ રડતી હોઉં ને તું મને ચૂપ પણ ના રાખે,
મારા ઉપરથી તારી લાગણી ઓછી થાય, મને ગમતું નથી.
આખો દિવસ સાથે હોય ને છતા પણ તું દૂર લાગે,
આમ તારાથી દૂર રહેવું, મને ગમતું નથી.
હું બોલું તું ના સમજે ને તું બોલે હું ના સમજુ ,
આવી અણસમજ મને ગમતી નથી.
વળગીલે મને ને સાથે રડી લઈએ બંને,
આમ એકબીજા વગર સાચે બંનેને કંઈ ગમતું નથી.
The Audio Version of ‘આવું ગમતું નથી’
શબ્દ શોધવા નીકળી,
ને મારું દિલ ગદગદ થઈ જાય છે.
તારા માટે લખતા આજે એક,
અજબનો ગર્વ અનુભવ થાય છે.
મમમીની યાદ આવી તો,
મારા માટે એનો ખોળો બની જાય છે.
પપા જેવો પ્યાર આપી,
એક અડગ ઢાળ બની જાય છે.
અપેક્ષા વગર બસ તું,
પ્રેમ રેલાવતી જાય છે.
પોતાના માટે જ નહી પણ,
હર જીવ માટે જીવ બાળતી જાય છે.
અવાજ ભલેને મોટો હોય,
પણ દરેકના દિલમાં ઘર કરી જાય છે.
ના વાત કરું તારી સાથે,
તો મારો દિવસ ખાલી જાય છે.
ભૂલો કરું તો મને,
સાચો માર્ગ દેખાડતી જાય છે.
ક્યારેક તકલીફોથી થાકી જાઉં,
તો અજબની હિંમત આપતી જાય છે.
સવારની પહેલી કિરણથી,
બસ મહેનત કરતી જાય છે.
સપનાઓ અજબના સેવી,
સરળતાથી પૂરા કરતી જાય છે.
તારું ખડખડાટ હાસ્ય,
સૌના દિલને ખુશ કરી જાય છે.
એક અનોખી ખુશી,
બસ તને જોઈને જ દિલમાં થાય છે.
પરિવારની સાચી ઓળખ,
તારાથી જ મને સમજાય છે.
તું નજીક છે માટે જ,
જીવન જીવવાની મજા અલગ થતી જાય છે.
સાચા મિત્રની શોધમાં,
પણ તું જ મળી જાય છે.
મારા માટે તો તું,
ભગવાને આપેલું એક વરદાન બની જાય છે.
તારી તોલે કદી કોઈના આવશે,
એમ કહી મારુ દિલ રડી જાય છે.
નસીબદાર હોય જેને,
તારા જેવી બેન મળી જાય છે.
ઘણા પુણ્યો કર્યા હશે,
તું જેને પણ મળી જાય છે.
તને ખૂબ ચાહું છું “ નાનકડી નીપા”
દરેક ધડકન મારી બસ એ જ કહેતી જાય છે.
The Audio Version of ‘નાનકડી નીપા’
