નવો એક બદલાવ જોઉં છું,
અંદરથી એક નવી હિંમત જોઉં છું..
આંખોને અશ્રુ સાથેનો સંબંધ,
અચાનક છૂટતો જોઉં છું..
કોઈ શું વિચાર છે કે કહેશે,
એ વિચારને તૂટતો જોઉં છું..
ઘણું બધું ચાલી રહ્યું છે આજુબાજુ,
જે ચાલે છે બસ એને જોઉં છું..
શું સાચું ને શું ખોટું એની ખબર નથી,
અંદરથી એક શ્રદ્ધા ને જોઉં છું..
એક અવાજ હંમેશા સંભળાય છે મને,
એમાં જ એક વિશ્વાસ ને જોઉં છું.
નાનપણથી મક્કમ મનના તમે,
બસ તમારા જેવી નીડરતા જોઈએ છે.
સમય જોયા વગર હંમેશા કામ કરતા,
બસ તમારા જેવી ધગશ જોઈએ છે.
તકલીફોમાં પણ હસતા અને મજા કરાવતા,
તમારા જેવી સહનશીલતા જોઈએ છે.
પરિવારને એક પૂરું નામ આપ્યું તમે,
તમારા જેવી લાગણી જોઈએ છે.
બીજાની અનુકૂળતા પહેલા જોતા તમે,
તમારા જેવી સમજ જોઈએ છે.
કેટલું એ શીખવાનું છે આપ પાસે પપ્પા,
સૌ પહેલા મને તમારા જેવી હિંમત જોઈએ છે.
રસ્તો કંઈ એવો સરળ નથી,
પણ આગળ વધવાની હિંમત રાખું છું..
સપનાઓ ઘણા મોટા છે,
માટે રાત દિવસ ઘણી મહેનત કરું છું..
નવી નવી વ્યક્તિઓને રોજ મળીને,
સૌની પાસે રોજ કંઈક નવું શીખું છું..
સાથ તારો એક આશીર્વાદ જેવો છે,
ત્યારે જ તો ખૂબ ઝડપથી આગળ વધું છું..
ઉત્સાહ અંદરથી ગજબનો છે,
માટે ડર્યા વગર રોજ કંઈક અલગ કરું છું..
મંઝિલ ભલેને કેટલી એ દૂર હોય,
પહોંચીશ ચોક્કસથી એવો વિશ્વાસ રાખું છું..
અંદરથી અવાજ આવ્યો અને નક્કી કરી દીધું,
હવે તારી રાહ જોવાનું છોડી દીધું ..
વાંક વગર વારંવાર ઘણી માફી માંગી,
બસ હવે માફી માંગવાનું છોડી દીધું ..
કપટ એટલો દેખાયો તારી વાતોમાં કે,
તારી વાતોને માનવાનું છોડી દીધું ..
સંબંધ સાચવવાની ઘણી કોશિશ કરી,
બસ હવે ખોટા પ્રયત્નો કરવાનું છોડી દીધું ..
યાદોને યાદ કરી એકાંતમાં ખૂબ રડી,
બસ હવે દિલને દુખાવાનું છોડી દીધું ..
માનની નહીં સન્માનની વાત છે હવે,
માટે જ તારા ઘરના રસ્તે આવવાનું છોડી દીધું..
ઘણા લોકો જીવનમાં આવીને જતા હોય,
જે રહી જાય શું પોતાના હોય છે?
મળીને ખૂબ હસતા હોય,
કોણ જાણે કેમ પછી પાછળ વાતો કરતા હોય છે?
પોતાના સંબંધો સાચવતા જાય,
કોણ જાણે કેમ બીજાના સંબંધમાં ઝેર ભરતા હોય છે?
મીઠી મીઠી વાતો કરી સારા બનતા હોય,
કોણ જાણે અંદરથી કેમ આટલા કડવા હોય છે?
દિલમાં કેટલાય પ્રશ્નો અને અકળામણ કરી જાય,
કેમ ઘણા લોકો કંઈક આવા હોય છે?
હંમેશા દિલને મનાવીને મનાવી લઉં છું તને
એકવાર તો તું મનાવી લે…
ભૂલ તારાથી પણ થઈને મારાથી પણ થઈ
એકવાર તો માફી તું માંગી લે…
જિંદગીનો ક્યાં ભરોસો છે
એકવાર ફરી સાથ આપીને જીવી તો લે…
ક્યાં સુધી મનમાં કડવાશ ભરીને રાખશે
એકવાર થોડી મીઠાશ સંબંધમાં ભરી તો લે…
હજી એ તારી જગ્યા ત્યાં છે મારા દિલમાં
એકવાર થોડું અંદર ઝાંકી તો લે…
લોકોની વાત સાંભળવાની આદત છે તને
એકવાર ખુદના દિલની સાંભળી તો લે…
નીકીની કવિતાની સાતમી વર્ષગાંઠ .. સાત વર્ષનો સફર સરળ નહોતો પણ ખૂબ મજા નો હતો એ પાકું છે .આનો આનંદ કયા શબ્દોમાં વ્યક્ત કરું? નિયમિત રહેવાથી મનને જે આનંદ મળે છે એ આજે તમારી સાથે શેર કરવો છે .
સાત વર્ષ … સાચે નવાઈ લાગે છે ને? હું નીકીની કવિતા સાથે જ નહીં આપ સૌ સાથે છેલ્લા સાત વર્ષથી જોડાયેલી છું. કદાચ દર રવિવારે જે પણ મારી કવિતા વાંચતું હશે તે ચોક્કસથી દરેક વ્યક્તિ મારી લાગણીઓને પણ વાંચી શકતું હશે. તમારા સૌના સાથના કારણે જ મારું લખવાનું કે મારા વિચારો આપ સુધી આવતા ક્યારેય અટક્યા નહીં. આ achieve કરવાની મને ઘણી ખુશી છે.
દર રવિવારે જ્યારે આપ સોૌના મેસેજ આવે છે કે આ લખાયેલી વાત જાણે મેં તમારા જીવનમાં બનતા બનાવો ઉપર જ લખી છે કે કદાચ તમારી લાગણીઓને વ્યક્ત કરી છે ત્યારે મને ખૂબ આનંદ થાય છે. આપ સૌના અલગ અલગ વિષય પર સૂચન મને આવતા પણ હોય છે. તમારી આતુરતા અને લાગણીઓ જોઈ મને વધુને વધુ સારું લખવાનું પ્રોત્સાહન મળે છે. દરેક કવિતા જીવનમાં થતા કોઈકને કોઈકના અનુભવથી જ લખું છું માટે જ એ તમને તમારા જીવનનો અનુભવ પણ લાગે છે.
દરેક વ્યક્તિ જે દર રવિવારે નીકીની કવિતા વાંચે છે, ને થોડા જે કે કોઈક જ રવિવારે વાંચે છે અને ઘણા જે નથી પણ વાંચતા તે દરેકની હું દિલથી ઋણી છું કારણ કે દરેક વ્યક્તિ મને કંઈક શીખવાડે છે. નિયમિતતા જીવનને ખૂબ સુંદર બનાવે છે. તમને ગમતી કોઈપણ બાબત કેમ ના હોય ..? પણ તમારી મંઝિલે પહોંચવાનો એક મહત્વનો હિસ્સો છે અને એ હશે તો અચૂકથી તમે તમારા ધ્યેયની દરરોજ નજીક જઈ રહ્યા છો.
આજે નક્કી કરો તમને શું કરવાનું ખૂબ ગમે છે? અને એના માટે દરરોજ માત્ર 30 મિનિટ આપો. મારી તમને ખાત્રી છે કે તમને અંદરથી ખુશી નો અનુભવ થશે. તમે દરરોજ તમને ખુદને ચાહતા થઈ જશો અને જ્યારે આપણે ખુદને ચાહીએ છીએ ત્યારે આપણે બીજાને પ્રેમ કરવાનું ઘણું સરળ થતું જાય છે. હું ક્યારેય પણ સ્ટ્રેસમાં હોવ તો મારી લખવાની આદતના કારણે હું ખૂબ ઝડપથી નોર્મલ થઈ જાઉં છું. મારા ધ્યેય તરફ હંમેશા ફોકસ હોઉં છું. જે વિચારું છું અચાનક જીવનમાં થવા માંડે છે. જે લખું છું અચાનક કોઈની લાગણી બની જાય છે અને manifest કરેલી વાતો પણ સાચી પડવા માંડે છે. મારી સાથે જીવનમાં રોજ એવું કંઈ બનતું જાય છે જે મને જાણે જાદુ જેવું લાગે છે એનાથી મને વધુ ને વધુ વિશ્વાસ થતો જાય છે. જીવન જીવવાની મજા કંઇક અલગ આવે છે. પ્રયત્ન જરૂરથી કરજો બસ એક કાગળ પેન અને થોડી શ્રદ્ધા જીવન જીવવાની સરળ રીત બની જાય છે, પણ જે પણ નક્કી કરો બસ એમાં નિયમિત રહેજો એવું લાગશે જાણે તમે જગ જીતી ગયા.
Thank you.
કાશ આજના દિવસે તું મારી સાથે હોય
ને તારા હાથ માં મારો હાથ હોય
એનાથી વધુ ખુશી મારા માટે શું હોય..
વરસાદ પડે ને એક ગજબની સુવાસ હોય
ને એના ખાબોચિયામાં તારા ને મારા છબછબિયાં હોય
આવા દિવસો આપણા કાશ રોજ હોય..
દિવસ અને રાત તારી સાથે હંમેશા લાંબા હોય
અને ભીડમાં પણ તારી નજર ખાલી મારા પર જ હોય
સપનાઓ તારી સાથે જોઉં ને હંમેશા સાચા હોય..
દરેક ધબકારને તારા સમજતો મારો ધબકાર હોય
કેટલા પણ દૂર હોઈએ બસ એકબીજાનો અહેસાસ હોય
બસ આજ ખજાનો જિંદગીની આખરી પળો સુધી મારી સાથે હોય..
ભલે રોજ વાત ના કરીએ
પણ હંમેશા મારી રાહ જુએ
આવા છે કંઈક મારા ભાઈ..
મળીએ ત્યારે ખૂબ મજા કરાવે
ને આખી આખી રાત જાગી ધમાલ કરાવે
આવા છે કંઈક મારા ભાઈ..
એની તકલીફો જલ્દી નથી કહેતા
પણ મારી તકલીફ સાંભળવા તૈયાર હોય છે
આવા છે કંઈક મારા ભાઈ..
કહું કંઈ પણ તો કરીલે છે બંને
ને ના કીધેલી વાત પણ સમજી જાય છે
આવા છે કંઈક મારા ભાઈ..
સમય કેવો પણ હોય હાર નથી માનતા
ખુદ પર હંમેશા વિશ્વાસ રાખે
આવા છે કંઈ મારા ભાઈ..
એકબીજાનું હંમેશા ધ્યાન રાખે
ને અમ સૌને પૂરો સમય આપે
આવા છે કંઈક મારા ભાઈ.
ક્યારે તારી યાદ આવી જાય તો શું કરું?
ને વળી એમાં તારી સાથે વાત ના થાય તો શું કરું?
લખવા બેસું દિલની વાતને,
કાગળના મળે તો શું કરું?
કહેવું ઘણું હોય છે તને,
પણ જો શબ્દો ના મળે તો શું કરું?
દિલમાં થતી ગળમથલને અકળામણ ,
મને જ ના સમજાય તો શું કરું?
કહી દે છે લોકો જવા દે હવે,
પણ વિતેલી વાતો ભુલાય જ ના તો શું કરું?
