જ્યાં હૃદયને શાંતિ મળે,
ત્યાં જ બેસવું..
જ્યાં મુખ પર સ્મિત આવે,
ત્યાં જ રહેવું..
જે સંગતમાં મન થાકે,
ત્યાંથી દૂર થઈ જવું..
જ્યાં કંઈ ના સમજાય,
ત્યાં ના જ રહેવું..
જ્યાં ના ગમે,
ત્યાંથી આગળ વધવું..
સારા વિચાર સારો સાથ મળે,
તો ત્યાં જઈ ભળવું..
જીવન છે નાનું,ખુદને સાચવી,
સારા લોકોને આનંદથી મળવું.
દૂર છતાં દિલમાં હંમેશા વસે છે,
યાદોમાં છબી રોજ નવી રચે છે તું..
તારું સ્થાન કદી કોઈ લઈ શકતું નથી,
ના કહું ને બસ સમજી લે તું..
મને ખૂબ પ્રિય અને મારી વાતોમાં છે,
મારી માટે સાચો મિત્ર છે તું..
જાણું છું વિશ્વાસ કરવો ક્યારેક મુશ્કેલ છે,
અડગ અને અતૂટ છે દોસ્તી આપણી માની લે તું..
તારા વગર દરેક તહેવાર અધૂરા લાગે,
દોસ્ત,મારા જીવનનો ખાસ હિસ્સો છે તું.
ધાર્મિક દિવસો આવે ત્યારે,
મનથી દુનિયા છૂટી જાય.
ગુરુ સાથે બેસી ધ્યાનમાં,
હળવી હવાની જેમ શાંતિ છવાય.
દેરાસર જવા પગ એવા ઉપડે ત્યાં,
અંતર આત્મા ઉજળો થઈ જાય.
પ્રભુ ભક્તિમાં ડૂબી જાઉં જો,
દુઃખ ચિંતા બધું ભૂલી જવાય.
પ્રાર્થનાની મીઠી ઘડી,
હૃદયમાં એક પ્રકાશ જગાવી જાય.
એવી શાંતિ,એવો અનહદ આનંદ,
પ્રભુ સાથેનો જાણે સફર કરાવી જાય.
શબ્દોમાં વણાઈ ગઈ
મારી લાગણીની કહાની,
દરેક પંક્તિ જાણે
તમારી પ્રેમભરી નિશાની ..
આઠ વર્ષથી લખું છું
કવિતા મનના રંગોથી ,
દરેક પરિસ્થિતિએ આપી
નવી એક પ્રેરણા અંતરથી ..
સફર છે આ રંગીન
માત્ર તમારા સાથ અને પ્રેમથી,
આભાર શબ્દ તો નાનો છે
ઋણી છું આપ સૌની અંત: હ્રદયથી..
બની ગઈ આઠ વર્ષની યાદો
અમૂલ્ય ખજાનો જીવનનો,
પૂરું થશે આગળનું સપનું
બસ તમારા જ સહકારથી..
મારી જ મસ્તીમાં છું હું,
ને જીવનને મજાથી જીવું છું..
નવા દેશ, નવી જગ્યા, સુંદર વાતાવરણ,
દરેક પળોને હું દિલ થી માણું છું..
નથી ગમતું મને પાછળ જોવું,
બસ મારી ધૂનમાં વહેતી જાઉં છું..
‘લોકો શું કહેશે’ એની ચિંતા છોડી,
મારું જીવન મારી મરજીથી જીવું છું..
અઘરો સમય આવી જો જાય,
‘આ પણ વીતી જશે’ કહીને મનમાં હસી લઉં છું..
કદર કરે જો કોઈ એને જીવનનો હિસ્સો બનાવું,
નહીં તો બસ આગળ વધી જાઉં છું..
પ્રયત્ન એક જ કરું છું,
આજ અને આવતીકાલે સહજ બનાવું છું..
જીવન છે મારું એક સુંદર સફર,
દરરોજ નવી એક યાદ બનાવું છું..
શાંતિ શોધવા બહાર મન અટવાતું,
અંતે અંદર જ કંઈક મળી ગયું .
બસ આંખો બંધ કરી,શ્વાસ જોયો ,
જાણે બધું અંદરથી બદલાઈ ગયું.
ધ્યાન મને મારા નજીક લાવતું,
ભૂતકાળ ભવિષ્ય બધું અટકાવી ગયું .
હવામાન જેવું મન હતું પહેલા,
ધ્યાન એને મધુર બનાવતું ગયું .
હવે દરરોજ થોડી ક્ષણો લઉં,
મારી સાથે હું મૌનમાં રહું .
એ અવાજ નથી બસ શાંતિ છે ,
જ્યાં હું મારી જાતને જ મળું.
અતીતને ભૂલી જા હવે,
જ્યાં દુઃખની માત્ર યાદો રહે..
વીતેલી પળો જ્યાં ખાલી દલીલો હતી,
ભૂલીને એક શાંતિનો અનુભવ કર હવે..
કાલ ની વાતો રાખ પાછળ,
આજને શ્વાસમાં ભરીલે હવે ..
જીવન તો પ્રવાહ છે વહેતો,
પાછળ જોવાથી મળશે શું હવે?
હાથમાં છે આપણા જ આજની ઘડી,
એમાં સંતોષ ને વળી ખુશી પણ રહે..
ભવિષ્યની ચિંતા બંધ કર,
જીવી લે ‘આજ‘ને દિલથી હવે..
શું મળશે રાખીને યાદો ખાટી,
અપનાવી લે મનથી હકીકત હવે..
રોજ એક નવી સવાર છે અહીં,
ચાલ જીવનના રસ્તે ફરી પગલા મૂકી દે હવે..
જ્યારે જ્યારે હું એને જોઉં,
એની દરેક વાતોમાં મને તું દેખાય..
પડછાયા ની જેમ તારી સાથે હોય,
તારી દરેક ઈચ્છા પૂરી કરવામાં એમાં ખુશી દેખાય…
તું કંઈ બોલે કે ના બોલે,
તારી ચુપ્પી પણ કોણ જાણે એને સમજાય..
તારો એક ફોન જ્યારે પણ આવે,
તો એ અંદરથી ખૂબ મલકાય..
સપનામાં પણ તને ખુશ જોવે,
ને દૂર હોય તો પણ અંદરથી તારા જ વિચારમાં દેખાય..
જિંદગીમાં તારો આ સાથી આવો છે,
તારી નાની સફળતા જોઈ એની આંખોમાં ભીની હરખાય..
બેસને પાંચ મિનિટ વધુ મારી સાથે,
એની માંગણીમાં બસ માત્ર આ જ કહેવાય..
તું એના કરતાં પણ ખૂબ આગળ વધે,
એની પ્રાર્થનામાં બસ એ જ બોલાય..
કોઈ હોય કે ના હોય તારી સાથે જીવનમાં,
દરેક ડગલે તારી સાથે ઊભો એ દેખાય..
દિલથી જાણું ને સમજું છું હું એને,
બીજું કોઈ નહીં, એને તારા પપ્પા કહેવાય..
હતો એક સમય, જ્યાં તું અને હું,
દિવસ શરૂઆત પણ સાથે કરીએ,
અને રાતના સપનામાં પણ સાથે ફરીએ…
હસતા, રડતા, ભૂલી જતાં દુનિયાને,
એકબીજાના સુખદુખ દિલ ખોલીને કહીએ…
પણ એક ક્ષણમાં કેમ બધું બદલાઈ ગયું?
એકબીજાથી અચાનક નજર ફેરવીને ફરીએ…
પળો કેમ ખાલી ને અધૂરી લાગે,
હવે જ્યારે પણ સાથે મળીએ…
હૃદય બોલે ફરી તો ના તૂટે ને કંઈ?
બસ એ જ ડર કોણ જાણે, દિલમાં લાગે…
વિશ્વાસ એકવાર તૂટી જાય,
તો સંબંધોમાં શું ફરીથી પ્રેમ મળશે?
આમ વારંવાર તારા જતા રહેવું,
શું મળશું ત્યારે બધું પહેલા જેવું જ લાગશે?
દોસ્તી તો આજે પણ છે, દોસ્ત,
શું પહેલા જેવી લાગણી પાછી આવશે?
દૂર કે પછી ક્યારેક શાંત લાગું તને,
સમજી લેજે પહેલા જેવી થતા મને થોડીવાર હજુ લાગશે…
કરીલે થોડો આરામ જીવનમાં,
ભરીલે આનંદ ખૂબ મનમાં…
દોડધામ છે રોજ અહીં,
ભૂલી ના જતા જીવવાનું આ ધમાલમાં…
બેસીને એક દિવસ શાંત થઈ જરા,
સૂરજની કિરણોને માણીને નજરમાં…
લાવી દે મુખ પર થોડું સ્મિત,
ને ભૂલી જા હર દુઃખ હાસ્યના ખડખડાટમાં…
જરૂરી છે મહેનત દરરોજ અહીં,
થંભી જા થોડી આ ભાગમભાગમાં…
બેસીને મિત્રો સાથે હસી લે થોડું,
બનાવી ને યાદો સૌ સાથે અહીં રખડવામાં…
નાવ ન હોવી જોઈએ તણાવથી ભરેલી,
કરીલે થોડી મસ્તીને મજા જીવનમાં…
જિંદગી છે એ ખૂબ સુંદર સફર,
ભરી લે ખુશીથી સુગંધ હર પળમાં…
